2014-06-09
太陽報
住宅市場近年受盡辣招影響，嚇到啲投資者都寧願轉投商廈市場。面對現時營商模式逐漸轉變，前補習天王吳賢德（Arthur Kho）就將住宅嘅劏房概念，應用喺寫字樓身上，佢將柴灣商廈東貿廣場27樓全層，分拆超過40個工作室，同跨國集團合作，透過品牌效應嚟提升物業租值。而依家樓市喺辣招下，佢暫時唔考慮買住宅，並估計未來兩年樓市會趨向平靜。
東貿廣場係區內全新落成嘅商廈，發展商恒地（00012）喺二○一一年底分批推出，上述27樓全層樓面建築面積7,700多方呎，原則係5個寫字樓單位。
Arthur同劉Sir講，依家社會營商模式開始轉變，新興行業對固定寫字樓需求少咗，所以就引入住宅嘅劏房概念，將全層拆細為超過40個現代化嘅工作室，可容納超過100人。
啱創業者 租期靈活
至於工作室嘅租金及租期會比較有彈性，視乎租客嘅行業，亦提供到一個平台畀有意創業嘅年輕人，租金回報亦都比較理想。
但係柴灣始終係二線區，最初要接觸優質嘅租戶會比較難，所以吳賢德就同跨國集團Regus合作，一來透過其環球網絡同管理服務吸納優質租戶，二來亦唔使操心租戶退租等問題。
吳賢德話佢雖然係學術派出身，但投資物業絕非理論派，必須親身實踐。
他憶述首次入市正值○三年沙士時期。當時，他以400多萬元買入九龍站擎天半島單位，之後趁樓價起飛獲利沽貨轉戰半山物業，再換貨掃入10多個北角細價單位收租。
投資變陣 住宅減磅
但係當持有單位愈多，管理上就出現問題，適逢一○年政府首推樓市辣招，所以決定統一管理，喺一一年開始賣出部分住宅，只係保留部分大單位收租，再買入上述東貿廣場全層樓面作長線收租。
對於政府連環出招，佢認為措施窒礙健康換樓方式，一旦撤招樓價又會升溫，所以預計今、明兩年二手樓市會較平靜。
劉Sir