2014-05-28
太陽報
各區天價一手車位成交湧現，發展商紛紛趁勢加入高價拆售車位行列以圖分一杯羮。新地（00016）下個月初就再度拆售將軍澳天晉1期車位，今次最高售價要成198萬元，勢創區內歷史新高，而嘉里建設（00683）亦會喺同日發售黃大仙現崇山車位，每個售價180萬元，雖然比起屋苑之前二手車位做價215萬元低水，但係都創區內一手車位新高價位。
樓價高位回落已經係不爭事實，但係各區車位售價仍然逆市屢創新高，劉Sir雖然身為行內人，但不時聽到啲車位成交價都會嘩嘩聲。
好似早排恒地（00012）西半山天匯就有車位以424萬元天價售出，創出咗全港車位歷來新高做價紀錄，其他發展商見車位有價有市，近排都爭住高價拆售旗下車位搶客。
有代理老友透露，新地旗下愈賣愈貴嘅天晉1期車位，下個月七號又會進行新一輪銷售，有興趣嘅屋苑一、二手業主都可以登記認購車位，每個單位只限購入1個車位。
需求殷切料反應佳
據最新價單顯示，新一批48個車位的售價介乎188萬至198萬元，比舊年第三季拆售時每個售價160餘至逾170萬元為高，而198萬元更加係將軍澳區歷來新高紀錄。
現崇山方面，聽代理老友講，發展商之前未有正式推售過屋苑車位，只係部分特色戶以連車位形式發售。
據悉，發展商已落實下月七日發售92個車位同22個電單車位，現時已經接受有興趣業主登記認購，每個車位售價180萬元，電單車位就賣10萬元。
美聯九龍區董事郭玉滿話，市區屋苑車位需求殷切，相信發展商拆售車位嘅成績都會理想。
溱林呎租貴尚城30%
她續稱，好似現崇山，屋苑早前有二手車位以售價215萬易手，創出區內車位新高價紀錄，即使今次推售車位定價180萬元，創區內車位一手新高紀錄，但係比起二手做價仍算低水吸引。
另外，新世界（00017）元朗溱林入伙以來剛錄首宗二手租務成交，屋苑9座低層B室以每月2.2萬元連車位租出，實用呎租21.8元，較鄰近尚城租值高逾30%。