2014-01-02
太陽報
未來幾年商廈新增供應唔似幾年前咁，淨係集中觀塘同九龍灣。睇番代理資料，今年至一六年期間，嚟自黃竹坑、新蒲崗、紅磡、沙田及荃灣五區，預計總共有11個商廈項目落成，總樓面約315萬方呎，佔期內總供應量35%，所佔比例係呢啲地區有紀錄以來最高。
過去五年，商廈新增主要嚟自觀塘、九龍灣、長沙灣及鰂魚涌等新興商業區。計起嚟佔每年整體供應逾八成。
地價低增發展意欲
不過，由於對外交通網絡愈來愈發達，加上上述黃竹坑等五區地價相對較低，增強發展商開拓另一新興商業區意欲，未來該等地區供應將陸續增加。
劉Sir睇番戴德梁行提供嘅資料，舊年整體新增商廈供應約172.6萬方呎，當中來自觀塘、九龍灣、葵涌、中環及金鐘區嘅供應量已佔去九成。
不過，嚟緊幾年情況會有變化，預計黃竹坑今年會有兩幢商廈落成，總樓面約32萬方呎，佔期內總供應量達23%，比例已按年大增，當中包括恒地（00012）嘅黃竹坑道21號環匯廣場，項目樓高36層，總樓面約20萬方呎。
環匯平均呎價近萬
該集團營業（一）部總經理林達民早前話，上述項目舊年已預售逾95%樓面，平均呎價近1萬元。
聽代理講，黃竹坑One Island South依家呎租約18至25元，港鐵南港島（東段）預計一五年通車，可望刺激該區商廈租金升兩至三成。
踏入一五年，預計黃竹坑、新蒲崗、紅磡及沙田總共有6個項目落成，總樓面共約208萬方呎，佔期內供應量約56%。
若以規模計，以會德豐地產一一年八月以逾40億元奪得的紅磡灣紅鸞道與建灣街交界商業地盤最勁，總樓面佔約58.9萬方呎。而億京發展一一年第四季先後投得沙田石門兩幅商貿用地，其中安群街與安麗街交界地盤，總樓面約35.2萬方呎；而安耀街與安群街交界地盤，總樓面亦有約43萬方呎。
長遠啲睇，一六年黃竹坑、新蒲崗及荃灣各有一項商廈預計落成，總樓面約74.8萬方呎，相對期內整體供應約19%。其中，嘉華地產嘅荃灣沙咀道2號項目，已命名為嘉達環球中心，總樓面約34.8萬方呎。
代理話，發展商可能短期內預售，相信部分高層單位呎價料可達約1萬元。
劉Sir