2014-05-20
太陽報
領匯（00823）旗下5個商場上個星期一炮過截標，劉Sir打聽到，領匯將會喺今個星期四公布中標結果。當中唯一可以分拆出售嘅深水埗寶熙苑商場，同藍田興田商場，市傳呢兩個商場已初步選定買家。其中以資深投資者黎永滔（滔哥），以及鄧成波（波叔）呼聲最高。
上星期截標嘅5個領匯商場，包括上述寶熙苑商場、興田商場、葵涌葵興商場、筲箕灣東熹苑商舖及停車場、同埋香港仔華貴商場。其中寶熙苑商場係呢5個商場當中，唯一可以拆售嘅商場，劉Sir知道呢個商場入標反應唔錯。
坊間有老友爆料，話寶熙苑商場買家以滔哥呼聲最高；興田商場就係以波叔呼聲較高。劉Sir尋日第一時間打畀滔哥，但係滔哥似乎毫不知情，仲話應該今個星期四先會公布。
於是劉Sir再向領匯求證，而領匯嗰邊就回應話，有關中標結果仍有待進一步消息。不過，所謂「空穴來風、未必無因」，孰真孰假相信後日自有分曉。
高威閣巨舖億三放售
近排投資者都幾積極放售舖位同寫字樓，美聯旺舖游院玲話，柴灣高威閣商場一樓A1及A2舖位，面積約6,500方呎及8,500方呎，以意向價約1.3億元一併放售，呎價約8,700元左右。
上述兩個舖位依家由牛記茶餐廳及超市租用緊，租金回報率逾3厘。
劉Sir知道，上址業主係投資者「藥房張」，佢最近先放售灣仔駱克道星港大廈地下D舖同埋一至三樓全層舖位，意向價約2.8億元。
甲廈零摸售 13年首見
另中原（工商舖）陳權威話，有投資者連環放售3個尖沙咀甲廈單位，涉額約4,400萬元，其中包括尖沙咀力寶太陽廣場7樓11室，以2,000萬元放售。
成交方面，香港置業黃璜話，該區宏貿發展大廈5樓全層，以約4,063萬元易手，呎價約1.3萬元，依家由美容中心以月租93,750萬元租用緊，回報率近3厘。
另一方面，辣招下寫字樓摸售個案急跌，中原黃良昇話，三月及四月均未錄得寫字樓摸售登記，連續兩個月「零摸貨」，為超過十三年以來首見。
劉Sir