【明報專訊】長江集團昨晚舉行周年晚宴，亦係李嘉誠退休後，長子李澤鉅（Victor）首次以集團主席身分出席晚宴。據講Victor往年晚宴都是坐主家席，讓同事輪流上前「集郵」，不過今年身分唔同咗，佢都改變玩法，唔坐主家席，改為滿場飛。但係晚宴全場有過百張枱，Victor都冇可能飛勻晒，你估真係叫小超人就曉飛咩，所以就由大會抽出十幾張枱號，等Victor輪流坐落去嗰十幾張枱，同啲同事一齊食飯傾偈，兼且方便同事影相打卡。而被抽中?枱號，席上員工除咗有得近距離接觸Victor，仲會有特別獎品，就係金幣一枚畀該枱?員工抽獎，抽中咗就真係雙重開心喇。
抽中枱號員工 可獲金幣一枚
另外，長江實業（1113）舊年公布重建中環和記大廈，不少租客據聞已經遷出，多年來駐守和記大廈?長和（0001）員工，亦都開始收拾細軟，目標係今個月底前搬過去一條馬路之隔?長江中心。據了解今次搬遷涉及超過200名員工，下個月開始就會進駐長江中心47至48樓，同大小李生喺同一幢大廈返工。