2014-05-15
太陽報
近呢幾年「當炒」嘅工廈單位，業主都「腳軟」減價出貨。不過，一向罕見業主主動放賣嘅工廈貨車位，每年買賣都唔多，只有三十至四十宗，大部分業主都可以賺錢離場。以葵涌、觀塘同沙田為例，呢類車位轉手賺幅由約兩成至逾1倍不等。其中，葵涌宏達工業中心有貨車位今年以約210萬元賣出，原業主持貨約半年，帳面淨袋約60萬元，賺幅約40%。
回報勝私家位 業主惜售
香港置業工商部區域營業董事黃寶偉同劉Sir講，由於工廈貨車位數目佔物業車位數量一般只一成至兩成，加埋業主收租回報率閒閒哋有4厘幾，比工廈私家車位收租回報率約兩厘半明顯好得多，所以業主好少主動放賣。
市場唔少買賣成交都係買家叫代理向業主提出洽購，先至可以成功購入，所以每年呢類車位買賣只約有三十至四十宗。
由於工廈貨車位咁搶手，辣招下仍有投資者獲利轉售。
葵涌放貨 叫價250萬
劉Sir聽講葵涌大連排道21號宏達工業中心貨車位，依家買賣放盤只有約五至六個，有啲業主叫價高達250萬元，較該工廈私家車位叫價高超過1倍，所以呢類罕有嘅車位點會平賣。
有個投資者舊年以約150萬元購入嘅雙號貨車位，今年經議價後以約210萬元賣出，樓價約六個月升值約60萬元，升幅約40%。
觀塘成業街15號成運工業大廈都有投資者短炒獲利離場，收到風物業係該廈一個雙號貨車位，月前以近180萬元賣出，原業主約七個月前以約150萬元購入，依家轉手帳面賺約30萬元，賺幅約20%。
工廈貨車位有價有市，沙田區部分持貨多年嘅業主早排都趁機出貨離場，賺幅以倍數計。其中，穗禾路1號豐利工業中心一個雙號貨車位，原業主○八年以約39萬元買番嚟，舊年以約82萬元沽出，約五年帳面賺約43萬元，賺幅逾1倍。
同區坳背灣街26號富騰工業中心雙號貨車位，今年初就以近134萬元賣咗，原業主持貨達十年，帳面淨袋68萬元。
劉Sir