2014-05-12
太陽報
近年政府大搞「保育中環」，造就荷李活道以南嘅蘇豪SoHo成為知名美食區，近年更進一步伸展到荷李活道以北嘅NoHo區，區內唔少街道已陸續轉型。其中以前行十步就有一間印刷舖嘅歌賦街，已變天成為咖啡店同時裝店等潮流商戶落腳點，數目高佔成條街嘅七成半。依家條街舖位呎租約80至120元，部分舖位租金加幅驚人，加幅由約五成至近1.2倍。
劉Sir有個代理老友數過，歌賦街有30幾個商戶，當中連鎖咖啡店、新式餅店，日式麵店、化妝品店及潮物用品等商戶佔約25個，佔整體七成半。
雙號地舖呎租107元
該類商戶賣中高價貨品同食品為主，承租能力有番咁上下，畀得起租。聽講早排有間咖啡店租咗一個雙號地舖，面積約750方呎，月租大約8萬元，呎租約107元，比起之前租金高出超過1.1倍。
依家歌賦街得番一間印刷舖，負責人之一嘅鄧先生話，「個舖早喺九十年代只以約100萬元買入自用至今，近半年有唔少地產代理提出有商戶洽租，月租可以去到十幾萬。由於租金可觀，公司都會考慮遷出，再轉租柴灣等租金平啲嘅工廈單位。」
代理估明年漲8成
有代理話，依家條街呎租約80至120元，約兩、三年間升咗六至七成，相對SoHo區嘅蘭桂坊、威靈頓街及士丹頓街等租金，仲低約三至四成，估計今、明兩年租金升幅最少仲有七至八成。依家嗰條街有個單號地舖，面積約700方呎，原本餐廳租用，業主依家叫租每月約6.8萬元，呎租約97元，比之前租金高出近1.2倍。
區內街坊陳小姐話，「近幾年中環街舖位租戶變化好大，其中荷李活道、歌賦街同埋九如坊等，新租戶唔少係連鎖時裝店及潮流家居擺設裝飾等店舖，業主點會唔趁機加租。」
劉Sir