2014-05-09
太陽報
樓市辣招嚇窒唔少資深投資者，搞到個個都唔多敢買住宅嚟投資。有「摸王」之稱嘅黎汝遠，過往以快買快賣為原則，自從有額外印花稅之後，短炒已冇咩肉食，今年更鮮聞買入住宅。劉Sir知道「摸王」見車位價格屢創新高，睇好車位市道，最近以每個196萬元破頂價買入北角和富中心兩個車位。
最近「摸王」黎汝遠或有關人士購入的和富中心兩個UG樓層車位，屬於孖住嘅車位，比較少同類放盤。
3年間升值九成三
現時每個成交價196萬元，相比屋苑舊年錄得嘅車位高價173萬元，再高出約13%；而每個車位喺二○一一年成交價只係101.5萬元，三年間足足升咗93%，同期表現跑贏住宅幾條街。
大家一定覺得好奇怪，「摸王」買車位用作投資，但依家破頂價買入究竟仲有冇水位？劉Sir知道「摸王」對車位後市幾睇好，佢本身揸住嘅和富中心車位，部分依家叫價去到220萬元。
講開車位價格，近期可謂有升冇跌，除咗沙田溱岸8號同九龍站擎天半島頻錄創高價成交外，連大型屋苑車位屢現高價。好似紅磡黃埔花園，最近有個雙號車位就以198萬元賣出，睇嚟好快大型屋苑車位做價可以突破200萬元；而跑馬地禮頓山最近有車位，以362萬元賣出。
有資深投資者轉去買車位，有投資財團就選擇沽貨套現。
重磅客再掟杏花邨
美聯李聖智話，柴灣杏花邨43座高層6室，建築/實用面積約766/645方呎，畀個換樓客以約730萬元買咗，建築/實用呎價約9,530/11,318元，約二十五年帳面升值654.2萬元。
有人爆料，上述單位由一個投資集團持有，上個月個財團喺同一屋苑都沽成6至7件貨，今個月就沽第1件。除此之外，個集團喺鴨脷洲海怡半島、紅磡黃埔花園同藍田麗港城都有貨，呢幾個月加加埋埋走咗至少廿幾件貨套現。
劉Sir