2014-05-08
太陽報
香港最近零售氣氛大不如前，吉舖愈嚟愈多，唔少舖位本年度應課差餉租值仲罕有咁大縮水，一、二線街有舖位業主都腳軟，要減租吸客，以免舖位長期丟空，減幅5至8%。聽講銅鑼灣波斯富街地舖及旺角西洋菜南街雙號舖業主，近排均要減租以傾掂續租。有舖位投資者估計，今年舖位租金有5至10%下調壓力。
過去一年，香港零售業氣氛麻麻，除咗少數核心零售街龍頭舖仲有租金倍增個案之外，部分成交租金升幅都只得約20至60%，有啲業主更加要減租搶客。
西洋菜南街削租7%
有代理同劉Sir講，上述西洋菜南街雙號地舖，近排以每月約44.5萬元續租，以面積約450方呎計，呎租約989元，比起之前租金每月約48萬元，每月減少約3.5萬元，減幅約7.3%。
有代理報料，銅鑼灣波斯富街有個面積約1,000方呎嘅雙號地舖，業主每月減租3萬元成功留住租客續租。
上述波斯富街舖位新租金每月約53萬元，呎租約530元，租金減幅約5.4%，相比本年度應課差餉租值每月低15萬元，低約22%。
登龍街求客 少收四千
同區登龍街亦有地舖業主減租吸客，聽講有個面積約1,400方呎單號舖，以每月約13.6萬元租畀食肆，比起前租金每月少收約4,000元，租金減幅約2.9%，相對本年度應課差餉租值每月少約8,000元。
另永義國際（01218）日前公布以2.368億元購入同區勿地臣街15號地舖，該集團於二○一二年已收購地舖樓上5伙單位，故已統一上址。
舖位資深投資者黃海明話，近年本港大部分零售業都係內地旅客「撐住」。但趨勢係來自二、三線城市旅客開始增多，佢哋消費力會弱啲，零售環境出現大調整，料今年租金會有5至10%下調壓力。
劉Sir