2014-05-05
太陽報
今個星期五將有兩幅唔同類型嘅住宅地皮截標，最矚目梗係壽臣山道西豪宅地，有測量師老友形容為「十年難得一見嘅靚地」，料每方呎樓面呎價達約3.5萬元，有望打入政府賣地歷來呎價最高嘅三甲位置。附近有洋房項目嘅新地（00016）可能會競投；會德豐地產都話會留意。至於屯門井財街限量地嘅估值約2.7至3.8億元。
預計可建32幢洋房
市區豪宅地難求，港島洋房地皮就更加矜貴。劉Sir知道，上述壽臣山道西與黃竹坑徑交界豪宅地，佔地約11.69萬方呎，總樓面大約8.77萬方呎，預計可以打造成提供32幢洋房嘅項目。
老友高緯環球張翹楚就話，呢幅壽臣山道西豪宅地係「十年難得一見嘅靚地」，就算發展成本會比較高，但就認為長遠睇「唔會輸」，預計每方呎樓面地價約3.5萬元。折合估值約30.7億元，係市場估值上限價。
如果地皮最後真係以樓面呎價3.5萬元批出，地皮就會取代山頂聶歌信山道豪宅地，成為歷來政府賣地呎價第三高嘅地皮；而目前樓面呎價最貴嘅兩幅地，都係港島豪宅頂級靚地，分別係山頂加列山道12號及南灣道近35號地皮，成交樓面呎價超過4.2萬元及3.8萬元。
屯門限量地料2.7億
劉Sir有預感，呢幅壽臣山道西豪宅地發展商會好積極參與。好似附近有洋房項目SHOUSON PEAK嘅新地，都幾有機會入標競投。至於會德豐地產常務董事黃光耀早前都向劉Sir透露，話集團都留意緊呢個豪宅項目。
同日截標嘅屯門第4區井財街限量地，規模同埋關注度都遜色，地皮限建唔少過140個單位，買方要負責興建安老院、長者日間護理中心，最大樓面15.2萬方呎。理想城市張聖典話，項目估值2.7億元。樓面呎價1,800元，係市場嘅下限價。
劉Sir