2014-05-02
太陽報
近期人民幣匯價係咁跌，加埋內地經濟前景唔明朗，打亂唔少內地企業喺香港買寫字樓嘅計劃，有啲早排已決定轉買為租。其中，有租用灣仔會展廣場辦公大樓嘅內地貿易公司，半年前已諗緊斥約8,000萬元買該廈單位自用，早排已擱置計劃，以每月約16.5萬元預租該商廈一個高層戶。
近年人仔匯價大升，增強唔少內地企業嚟香港買寫字樓嘅意欲。不過，近排人仔匯價下跌，部分呢類準買家都擔心樓價會繼續跌，要諗耐少少先決定入唔入市買寫字樓，所以部分有自用需要嘅企業，轉為租用寫字樓單位。
劉Sir睇番代理數據，港島上環、中環、金鐘及灣仔共10幢甲級寫字樓，過去兩個月共有約30宗租賃成交，當中佔40%係內地企業租客。
會展內地客 洽購變預租
一向廣受內地企業追捧嘅會展廣場辦公大樓，聽講有租用該廈中層戶已近六年嘅內地貿易公司，約半年前開始物色租轉買會展約2,800方呎單位自用，涉資約8,000萬元，呎價約2.8萬元。
但係洽購期間突然遇上人仔貶值，大失預算，由於依家租緊單位租期今年下半年屆滿，早排決定暫時預租該廈高層一個約3,000方呎的單位，月租約16.5萬元，呎租約55元。
另一方面，有間內地公司原先計劃喺金鐘買一個面積約2,600方呎寫字樓自用，隨着人仔匯價波動，公司因為周轉問題，最終決定繼續租用同區寫字樓。
呢間公司早排決定租用美國銀行中心一個中層戶，面積約1,300方呎，月租約7.54萬元，呎租約58元。
「收水」夾擊 入市趨審慎
美聯工商舖（00459）行政總裁黃漢成話，人仔貶值同埋內地銀行「收水」，內資機構喺香港買寫字樓都審慎好多。
劉Sir