2014-04-28
太陽報
港鐵（00066）將軍澳日出康城第四期發展項目會喺今日截標，今次補地價金額平均每方呎雖然只有約2,059元，但有測量師老友就覺得，計埋建築成本同埋分紅等，將來比起區內二手溢價，相信會高達一至兩成，有一定風險。加上目前日出康城一至三期全由長實（00001）投得，估計最後只有3至4份入標都唔奇，其中長實已講明會積極競投。
今次截標嘅日出康城第四期發展項目唔再採用變相「一口價」形式招標，而回歸到傳統嘅辦法，即係設有既定嘅補地價金額。
劉Sir早就收都風，項目補地價金額約27.1億元，每方呎約2,059元，另外要畀前期工程費就大約2.9億元。至於分紅由發展商自己提出，睇怕分紅都係今次邊間發展商中標嘅關鍵所在。
為免再出現流標事件，日出康城第四期補地價金額已經比市場預期低，如果對比○七年底批出嘅第三期發展每方呎補價約2,410元，仲大幅低咗約14.6%。
落成樓價或貴兩成
不過，近年發展商建築成本愈來愈貴，同區二手做價又低水，有老友認為仍有一定風險。
高緯環球張翹楚同劉Sir講，雖然日出康城第四期補地價金額每方呎只係約2,059元，但其實計埋建築成本、前期工程費、分紅同埋發展商利潤等，項目將來建築呎價已經要約7,000元。但係現時區內二手實用呎價只係講緊約7,000至8,000元，計落將來呎價較同區二手溢價，隨時多達一至兩成。
長實表明全力競逐
佢仲話，日出康城頭三期都係長實發展，其他財團要插隻腳埋去有一定難處，再加上項目第三期緻藍天預計短期內開價，定價水平由長實掌握，所以其他財團出價所承擔嘅風險亦會較高，估計最後只收到3至4份標書都唔奇。
事實上，長實一早同劉Sir講，今次會全力競投，集團執行董事趙國雄話，憑住過去首三期的發展經驗，會盡力爭取競投日出康城第四期。
劉Sir