2014-04-25
太陽報
政府呢期積極檢視各區土地用途，元朗錦田係未來重點開發地區，其中錦田北十幾年前有唔少地遷就西鐵線工程劃為未決定用途。劉Sir知道，呢批土地已開始釋放，規劃署建議將區內5幅未決定用途土地改劃住宅或綜合發展區，部分現由私人財團持有。今次仲順手放寬兩成發展密度，以佔地超過17公頃嘅長春新村用地最有分量，5幅地將提供約5,124伙住宅單位。
規劃署建議改劃錦田北多幅「未決定用途」土地，作為住宅或綜合發展區用途，仲順手放寬兩成發展密度，呢5幅地加埋有成33.7公頃，估計可以興建5,124個單位，容納人口超過1萬人。
長春新村地最夠分量
其中長春新村一幅佔地達17.09公頃嘅土地，計劃改做「綜合發展區」，地積比率1.2倍，最高層數16層，總樓面超過220萬方呎，單計呢個大型綜合發展區，已經可以起2,930個單位。
劉Sir知道，今次亦有兩幅「綜合發展及濕地改善區」用地，分別建議劃為「住宅（戊類）1」及「自然保育區」，估計項目可提供206個單位。不過，呢幅用地係長實持有，幾年前申請過做洋房發展，改劃上可能會受發展商反對都唔奇。
此外，政府早排建議改劃屯門多幅政府地作住宅用途，規劃署啱啱提出最新發展參數，呢14幅公營及私人住宅地皮，加埋提供約1.04萬伙。
部分私宅用地就有改動，好似佔地約4.8公頃嘅第48區前掃管軍營（近管青路）用地，將斬開為東面及西面兩部分，可發展面積約2.18及2.72公頃，地盤加埋比原先大少少，但發展密度就縮減約兩成，總樓面約75.1萬及95.8萬方呎，可建1,160及1,450伙。
屯門住宅地皮遭剔出
此外，原計劃改作住宅發展嘅屯門第55區掃管笏路與青山公路－掃管笏段交界地，則縮沙唔做住宅。
另近排有長沙灣商業地好價批出，政府乘勢將佔地約0.12公頃嘅葵涌大連排道熟食小販市場，由政府地改劃「商業（3）」用途，總樓面逾12萬方呎。
劉Sir