2014-04-15
太陽報
樓市轉勢，唔少銀主為咗吸引買家，都愈劈愈深，希望盡快甩貨。好似南區淺水灣麗景園罕有銀主盤，以3,300萬元「震撼」價開拍，比個別銀行約4,300萬元估價，低出成千萬，相差足足逾兩成。另大埔康樂園亦有個洋房銀主盤拍賣，再減價一成翻叮拍賣，最新開價只係2,700萬元。
傳統山頂及南區嘅銀主盤向來矚目，劉Sir梗係密切留意。位於麗景園8座低層有個連車位銀主單位，經忠誠拍賣行今個月尾推出拍賣，單位建築/實用面積約2,288/2,049方呎，開拍價只係3,300萬元，建築/實用呎價約14,423/16,105元。
據個別銀行網上資料顯示，呢個單位估價達約4,297萬元，今次開拍價低出997萬元或23%。睇番資料，原來呢個物業舊年年底曾經喺市場放盤，連車位叫價4,200萬元，不過經過幾個月都未獲承接。
減幅擴大高逾一成
拍賣行老友鄭世傑同劉Sir講，話呢期銀主減幅愈來愈勁，除咗因為市況唔同咗，亦唔想件貨擺太耐，為咗清貨將價錢愈調愈低，由以前一般減幅5%或以下，擴闊到依家一般都減5至10%，個別仲高逾一成，尤其係相對「難賣」嘅大價豪宅盤。
該行月底同場，亦推拍康樂園第10街雙號洋房銀主盤，建築/實用面積約3,500/2,513方呎，連2,663方呎花園，最新開拍價調減至2,700萬元。
資料顯示，舊年九月上址曾經以2,990萬元推拍，今次減幅約9.7%，現建築/實用呎價約7,714/10,744元。
健康邨無契筍價出貨
事實上，除咗豪宅劈價，細價樓亦以「筍價」出招搶客。好似北角健康邨2期康祥閣低層G室無契盤，承法院令以290萬元推出拍賣，單位建築/實用面積約538/395方呎。劉Sir聽拍賣行講，同類有契單位估價達460至480萬元，而呢個無契單位，依家開價至少低超過三成。