2014-04-14
太陽報
呢幾年多咗內地旅客嚟香港買完嘢就即走唔過夜，為咗把握分秒血拼，唔少去咗新界區。其中荃灣眾安街過去半年就有約4宗珠寶金行進駐租舖個案，有珠寶店就一口氣租用條街兩個舖位，月租加埋差唔多200萬元。另外，喺條街開業逾廿載嘅文具店都畀金行「踢走」，新租金升幅估計逾兩倍。
中港兩地交通網絡愈來愈發達，內地旅客都少咗喺香港過夜。劉Sir睇過香港旅遊發展局最新資料，舊年內地旅客來港唔過夜數字升到2,365多萬人次，按年大增近20%；而人均消費額約2,721元，亦升超過9%。
影音藥房成行成市
大約一年前，眾安街租戶仲有文具店同西餅店等民生商舖。不過，依家條街加埋約80多個租戶中，連鎖金行已佔共10間，高佔該街道商戶數目近八分之一；而連鎖影音店、化妝品店、藥房及找換店亦共近20間。
有代理同劉Sir講，依家條街地舖呎租由約50至300元，有啲涼茶舖同日用品店租緊舖位，如果畀金行睇中，估計新租金升幅閒閒哋可逾1倍。
佢仲話，原本由國美電器租用嘅眾安街27至33號地舖及1至3樓，其中地舖共約2,200方呎，舊年底畀周大福珠寶以每月約68萬元租咗，今年初間珠寶行再向資本策略地產（00497）預租埋80至82號全幢，面積約4,800方呎，月租約130萬元，呎租約270元。
內地旅客去荃灣消費增加，眾安街地舖業主都趁機加租，聽講原由文具店租用逾廿載嘅100號地舖及閣樓，面積約1,800方呎，舊年十月另一間珠寶行以每月約16萬元承租，租金升幅估計超過兩倍。
廣州客讚荃灣方便
嚟自廣州到荃灣血拼嘅莊先生話，以前經常到旺角及尖沙咀買嘢，經朋友介紹第一次到荃灣買金飾同奶粉等日用品，由深圳到荃灣車程唔使一個鐘，購物後即日下午可返廣州，慳番住酒店嘅錢。