2014-04-11
太陽報
劏舖細細粒，入場費唔高，加埋有租金回報保證，近排再掀炒風。舖位投資者林子峰上個月悉數拆售摸出晒嘅元朗又一新城，聽講再有二手短炒獲利成交。有一個雙號劏舖剛以330萬元摸上摸賣出，兩個星期左右帳面升值30萬元，原業主賺幅10%。另投資者陳秉志拆售嘅天水圍嘉湖新城幾日前已收票過百張，料明日開賣。
近排唔少舖位經紀都忙住做劏舖，有個老友就同劉Sir講，唔少買唔到劏舖嘅人，都會喺市場搵二手盤。
寫字樓上月零摸貨
好似又一新城一個雙號舖，面積約136方呎，啱啱以約330萬元摸上摸賣出，原業主約兩周前以300萬元買入，依家帳面賺約30萬元；而緊接拆售嘅嘉湖新城約189個劏舖，香港置業舖位部有個代理前幾日已計過，入票數目超過100張，業主諗住聽日賣，入場費約138萬元。
寫字樓摸貨就勁慘，據中原地產資料，三月份寫字樓摸貨宗數罕有「食蛋」，係二○○九年二月後首次，反映該類物業炒賣停頓。
唔少早前拆售嘅商場近排開始招租，不過，撞正零售租賃氣氛麻麻，所以舖壇老手尹柏權等旗下尖沙咀及荃灣嘅劏舖，依家都以平租搶客。
尖沙咀舖平租搶客
其中，以尖沙咀區內最低商場舖月租金作招徠、催谷入緊伙嘅尖沙咀首都廣場大批劏舖，目標租戶包括創業人士，以項目一個建築面積約50方呎舖位計，扣咗免租半年之後，月租低至約6,250元，比起附近嘅利時商場月租閒閒哋約1.6萬元，明顯吸引，聽講個場已經租出逾10個舖。
尹氏等嘅荃灣地皇廣場，依家租緊1及2樓共約160個舖，月租由約1.03至3.08萬元，附近嘅力生廣場1及2樓共有約100個劏舖月租約5,100至7,300元，兩個劏舖入場租金差唔多，其中地皇廣場已經租咗超過20個舖，有租戶已開始做緊裝修。