2014-04-11
經濟日報
撰文:蘭茜
欄名:樓市放大鏡
過去1個月，二手市場回暖，交投量急增，睇樓問盤亦見增加，但目前睇樓客傾向搵平價盤，對單位有要求，要有條件和具質素。
3月份細價樓二手氣氛不俗，兩大指標屋苑沙田第一城和天水圍嘉湖山莊錄60、70宗成交，沙田河畔花園亦錄得逾20宗成交，一洗以往悶局。
經過3月份一輪消化，累積市場多個月的貼價盤和具質素的單位已被吸納，新放盤補充速度較慢，特別是鎖匙盤，新放盤且叫價略高於市場成交價，如成交價約390萬元，新放盤開價約405萬元，高出4%至5%。
問價之餘 必須要有樓睇
事實上，市場不乏探盤問價，現時搵樓客相對現實，期待樓價回吐，希望等機會執平貨。不過，這批的搵樓客不單問價，還要有樓睇，屬睇樓派，即使價錢如何吸引，無樓睇的單位不感興趣，有別於年前的情況。
多年前，樓市氣氛熾熱，連有租客的單位亦被市場受落，無樓睇單位成交已見怪不怪，當時買方甘願冒無睇樓風險；但近日情況開始有轉變，單是睇環境和睇間隔已非現時搵樓客所求。
港島東一個3房連租約單位，原以市價880萬元放盤，及後上月底另一質素相若單位以805萬元易手，故將叫價下調至820萬元，叫價減60萬元，減幅近7%，業主肯減價主要是因放盤單位仍有租約，雖然可交吉賣，但無樓睇，故承接力有一定考驗。
睇樓旺場 惟還價意慾低
鎖匙盤緊絀下，代理惟有相約業主開門的單位或仍然居住單位睇樓，據了解，周六周日部分業主盤單位出現睇樓客一枱接一枱情況，敏感人士還以為市場暢旺之勢，其實並非如此，因為大部分睇樓客還價意慾低，對後市仍未樂觀，再者睇樓客渴求以筍價買具質素單位，揀到最合自己心水，對層數、對觀景和對坐向均有要求。