2014-04-10
太陽報
美國聯儲局開口為退市訂下時間表，令本港疲弱嘅工商舖市道更雪上加霜。代理數據顯示，商廈成交量跌勢最慘烈，上月只有35宗註冊量，按月少逾35%。期間工廈同商舖都只有100餘宗，跌幅逾10%，拖累上季整體工商舖註冊量得970宗，比舊年同期急插逾82%外，仲創九七年有紀錄以嚟按年首季嘅新低。
港島甲廈買賣十餘宗
劉Sir睇番美聯工商舖（00459）資料，今年一月商廈有約94宗註冊成交；二月就去到約54宗，跌幅近43%；三月再跌至約35宗，按月少逾35%外，宗數仲係該行九七年有紀錄後新低。
代理仲話，今年港島甲級商廈買賣只係錄約十餘宗，大部分成交都係嚟自九龍東新建商廈。
工廈入場費低，惟淡市下，買家仍好忍手。資料顯示，今年三月該類物業註冊量約104宗，按月料約15%，但相對一月約212宗，宗數大減超過一半。至於商舖買賣方面，上季各月註冊宗數僅徘徊大約105至125宗。
買家忍手 工廈淡風
綜合今年一至三月工商舖買賣慘況，首季該類物業註冊量最終只約970宗，比舊年首季嘅5,436宗，少約4,466宗，減幅逾82%，期內註冊金額只約134億元，比舊年同期約531億元，少約397億元，跌幅約75%。
美聯工商舖行政總裁黃漢成（Daniel）話，美國聯儲局退市消息，加埋息口將上調等因素，都令買家入市步伐轉慢。幸好，近排有啲工商舖業主開始願意調低叫價，預約睇樓亦明顯增加。
信德低層劈10%求客
聽講上環信德中心東翼有個低層單位，業主放售超過半年，依家調低叫價至每方呎約1.8萬元，減幅約一成，叫價約3,600萬元，相信好快賣得出。Daniel仲話，由於新界區陸續有劏舖拆售，料本季工商舖註冊量或升番去約1,500宗。