2014-04-09
太陽報
樓價愈劈愈低，租金亦企唔住，鴨脷洲海怡半島依家平均呎租，比上年暑假高位跌超過12%。近排有套三房單位，減租至月租僅1.5萬元租出，等同兩房租金，建築呎租19元都唔使，個價真係連新界盤都租唔到。
中原盧鏡豪同劉Sir講，海怡半島今個月已經有成10單租，平均實用呎租都係約28元，比上年暑假高位跌價成12.5%。
多咗租盤，租金當然要跌，好似有個17座中層有套房嘅三房單位，建築/實用面積約794/618方呎，月租減2,000元到1.5萬元租出，呢個絕對只係兩房價，建築/實用呎租約18.9/24.3元。另同屋苑28座有個相連單位，賣咗1,210萬元。
收租客掟貨 劈甩偉華
其實建築呎租低過二十元，租新界樓都唔得，好似沙田第一城之前有個兩房單位，新低月租8,300元租咗，但建築/實用呎租都要21/29.2元。
租金跌，投資者都掟貨，美聯陳國良話，沙田市中心屋苑今個月有9宗買賣，當中有個收緊租嘅投資者，一口氣賣咗兩間收緊租嘅偉華中心，包括1座高層D室，減25萬賣345萬元；另一間4座高層B室，都減25萬賣365萬元，但兩間都有錢賺。
其實樓價冧，都係佢哋走貨原因，陳氏爆料，同區好運中心楓林閣高層G室，放盤半日，減40萬即賣328萬元，減咗成11%，建築/實用呎價約7,847/10,061元，絕對係一二年價位。
天晉狠削百萬獲承接
中原伍錦基講，將軍澳天晉3座低層E室，減100萬賣600萬元，實用呎價約1.12萬元。美聯吳肇基話，鰂魚涌太古城今個月開7張單，其中6宗係三房。前日一日有3宗，有個元宮閣高層D室，年初到依家減214萬元，賣咗886萬元。
利嘉閣鮑允中講，九龍灣淘大花園N座高層1室，都減23萬賣咗382萬元。