2014-04-08
太陽報
「白居二」餘威猶在，去年做價急升嘅公、居屋物業，至今叫價仍然高企。估計現時市場最少有8宗公、居屋單位嘅銀主放盤，大部分更加係放賣多個月都仲未發市。個別經自由市場放售嘅單位，好似鑽石山龍蟠苑同沙田愉田苑銀主盤咁，放盤價分別為420萬同330萬元，雙雙比銀行估價高8%。
近排白居二成交個案愈來愈少，不過，劉Sir仍然好留意呢類物業。粗略計下數，原來市場已經累積咗唔少呢類銀主貨，涵蓋自由市場同第二市場，合共最少有8間。
華明邨綠表嗌138萬
好似愉田苑愉健閣極低層銀主單位，建築/實用面積約569/466方呎，分別經自由市場同第二市場放售，其中自由市場放盤價330萬元，而個別網上銀行估價304萬元，現放盤價高出7.88%；而綠表放盤叫價則260萬元。
另上述龍蟠苑龍珊閣低層銀主單位，日前自由市場叫價420萬元，單位建築/實用面積約579/426方呎，建築/實用呎價約7,254/9,859元，而個別網上銀行估價為387萬元，即放盤價高出7.86%。
此外，部分綠表銀主盤叫價亦高，其中粉嶺華明邨禮明樓高層單位，建築/實用面積約630/489方呎，綠表叫價138萬元，實用呎價約2,822元；睇番政府資料，同屋苑最近有個中層單位賣咗，實用呎價約2,661元。
有業內人士同劉Sir講，雖然第二批白居二威力比唔上舊年第一批，但兩批生力軍先後湧入市場，過去一年多已經刺激公屋同居屋做價節節上升，加上市場實際盤源並唔多，所以叫價方面都仍然幾高。
所以呢幾件銀主貨放咗盤好幾個月，都仲未賣到。據房委會最新資料，上個月公屋同居屋第二市場錄得213宗成交，按月少28宗。
曉峯估唔足價無承接
世紀21奇豐老友同劉Sir講，馬鞍山曉峯灣畔4座高層G室，實用面積482方呎，以約440萬元市價放盤，但個別銀行對單位網上估價僅約398萬元。
喺估價不足之下，雖然上述單位係市價，但尚未有承接。