2014-04-01
太陽報
第二季新盤競爭氣氛急速升溫，首季售樓成績標青的新地（00016），昨日已急不及待率先啟動旗下粉嶺瓏山1號推盤攻勢，樓書昨已突擊上網，今日首度舉行記者會公布最新部署，料最快下個禮拜開盤，勢為該集團第二季首個全新開售嘅樓盤。另長實（00001）等長沙灣丰滙昨日亦發出咗新銷售安排，落實禮拜五賣新一批93伙。
據一手銷售資訊網資料，瓏山1號樓書噚日突擊上網，樓盤網站同步啟用。根據條例，項目最快下個禮拜可開售，發展商今日首度舉行新聞發布會披露部署。
市場人士同劉Sir講，瓏山1號快將展開商場路演吸客，示範單位估計最快今個禮拜後期到下個禮拜開放，項目勢力爭成為集團第二季首個開售全新樓盤。
瓏山1號提供約144伙，標準戶實用面積介乎511至1,226方呎，特色戶最大面積為1,754方呎。
至於同系元朗爾巒今日首度重推12座洋房發售，據講，市場已有10幾張入票，市傳早前已大手掃入項目29伙的港島豪宅業主豪客，已大手入票數張。
COHO睇樓 周五抽籤
至於丰滙繼沽清首批連加推216伙後，發展商噚日發出咗新一批93伙的銷售安排，落實禮拜五賣，有興趣人士可以喺今個禮拜四晚九點或之前遞交買樓意向。
至港島銅鑼灣嘅COHO，金朝陽（00878）執行董事陳慧苓話，個盤禮拜五傍晚六點抽籤形式發售，喺金朝陽中心嘅示範單位噚日正式開放比公眾參觀，包括一個裝修同一個清水房，都係實用面積314方呎嘅一房間隔。
代理首季佣金參差
中原陳永傑話，公司香港住宅部上個月佣金收入料約2億元，首季佣金收入料約5億元，較舊年第四季少約18%，預期本月佣金收入可進一步升至2.5億元。
利嘉閣廖偉強話，公司首季業績表現合理，三月料錄超過1億元嘅佣金收入，首季佣金收入料逾2.5億元，可望獲得利潤，相對去年全年虧損已算「轉虧為盈」。