2014-03-31
太陽報
近排政府推售嘅大型住宅地結果都幾慘淡，嚟緊星期五又再有三幅地皮截標，包括筲箕灣愛勤道及沙田大圍美田路兩幅住宅地，同埋長沙灣道商業地。不過，呢三幅地發展規模都好細，有測量師老友覺得地皮細其實有着數，啱中小型發展商「胃口」，較易被吸納，料入標氣氛會唔錯，市場估計三幅地成交價加埋最高可以有17.26億元。
嚟緊截標嘅三幅地皮發展規模比較細，劉Sir覺得中小型財團都唔難負擔。理想城市張聖典話，雖然近排有大型住宅地出現流標同埋低價成交，但相信同樣情況唔會發生喺即將截標嘅三幅地皮身上，佢話土地規模細有着數，會較容易去貨。
筲箕灣地臨海罕有
呢三幅地皮之中，以筲箕灣愛勤道與愛德街交界住宅地較有睇頭，係港島區罕有臨海地皮供應。張聖典話，該地皮地盤面積較細，享有鯉魚門海景，睇怕做價唔會太低，估計每方呎樓面地價約7,700元，估值大約3.6億元。劉Sir知道，該地皮市場估值最高每方呎達約9,100元水平，估值約4.2億元。
至於大圍美田路地皮就可以作商住發展，最高可建總樓面約5.25萬方呎。張聖典話，呢幅地皮係質素最遜色嘅一幅，因為地盤呈不規則形狀，較難剪裁，對發展商會帶來相當考驗。
大圍樓面呎價料四千
再者，上述大圍美田路地皮又唔近港鐵大圍站，預期樓面呎價約4,000元。劉Sir屈指一算，折合估值約2.1億元。
而同日亦會有一幅商業地截標，呢幅地皮係長沙灣道650號商業地，最高樓面約19.35萬方呎，招標條款提到，中標財團要負責重置郵政局同埋其附屬泊車位等，而所佔面積會包含喺總樓面入面。
不過，雖然地皮好似有好多條款，但始終政府嘅樓市辣招對住宅項目影響較深，所以劉Sir相信呢幅商業地都有一定捧場客。
好似喺區內有發展經驗嘅億京發展等財團，相信都有機會參與競投，市場估值最高約10.64億元，樓面呎價5,500元。