2014-03-24
太陽報
近幾年東九龍有唔少新建商廈落成，成功帶旺附近街道嘅地廠，就連二線街都開始受到大型商戶垂青，好似遠離港鐵站嘅觀塘偉業街一帶地廠，聽講近排吸引銀行連鎖店及食肆透過代理問緊放租詳情，依家條街有約莫3個地廠交吉放租，部分業主意向租金較前租金都加咗近九成。
劉Sir去咗偉業街睇過，嗰度約莫有30間地廠，而租戶大部分都係汽車維修、售賣五金同埋機械配件，依家地廠平均呎租10多元，比起同區近港鐵站嘅開源道地廠動輒百元計，明顯低約九成。
不過，隨住附近嘅海濱道同駿業街有商廈落成或重建，以及同街213號Pioneer Place工廈活化項目入伙，相信將可提升偉業街地廠租金。
有個租緊偉業街單號地廠做汽車維修嘅負責人話，條街地廠租戶十居其九都係汽車相關行業。不過，自從附近有酒店開幕，加埋商廈愈來愈多，遊客同上班一族數目開始增加，都擔心將來同銀行搶租。
全街僅三盤唔憂租
依家偉業街得果約莫3個地廠招租，業主都唔憂租，其中，美嘉工業大廈有個面積約4,200方呎嘅地廠，原先由汽車維修公司租用，每方呎租金料約9元，但業主最新意向租金每方呎約17元，月租金約7.1萬元，新租金升咗近90%。
三千呎意向租六萬
另外，劉Sir收到風，有間銀行好有興趣傾租，考慮租用上址做個人理財中心。喺偉業街開設汽車美容及維修嘅陳先生好樂觀咁話，「附近新建商廈增加，可能會帶來更多汽車相關生意。」
同街嘅天順工業大廈都有個地廠放租，面積約3,000方呎，由於鄰近觀塘麗東酒店，聽講已有便利店及食肆問緊代理個盤詳情，而業主意向租金約6萬元，呎租約20元，較之前租金升逾85%。