2016-02-05
太陽報
新春開盤大軍壓境，軟銷攻勢一浪接一浪。新地（00016）元朗映御位於元朗YOHO MALL?路演，過去四日吸引咗超過4,000人次參觀，發展商尋日仲首度披露住客會所超過20項設施加強推廣，當中包括25米長戶外泳池同24小時健身房等等。至於新世界（00017）清水灣傲瀧?樓書尋日上載銷售監管局網站，即係最快春節後可以開賣。
對於上月樓價指數又再下跌，新地副董事總經理雷霆同劉Sir講，其實過去兩年樓價已經累積一定升幅，近月出現少少調整都係正常現象，佢強調，目前剛性需求仲好強勁，利率持續偏低都有利買家入市，預期今年樓價表現平穩，集團會繼續用市價推盤。
新地搞路演 四千客睇
新地代理業務部總經理張卓秀敏就透露，映御?住客會所，室內、外面積超過1.7萬方呎，提供25米室外泳池同埋健身室等設施。
項目喺YOHO MALL舉行?路演，月初開始至今已錄逾4,000人次參觀，平均每日人流都過千人。佢又話，映御?樓書會喺春節後上網，維持最快正月十五前賣樓。
會德豐地產常務董事黃光耀就話，受股匯市場波動等影響，年初時樓市可能會有啲壓力，上半年市況可能比較波動，但去到下半年將會回穩，樓價甚至可能出現回升，全年樓價波幅相信會喺10%以內。推盤策略方面，佢認為，發展商推盤壓力不大，若短期市況無咁明朗，大可以暫時減慢推盤，無必要加快推盤搶客。
帝滙預告「一定會加價」
豪宅方面，恒地（00012）營業（一）部總經理林達民透露，西半山帝滙豪庭最快會喺農曆新年後加推，仲話「一定會加價」，當中B、C單位加幅料約半成，A、D單位加幅仲考慮緊，料加幅少過半成。
佢仲話，帝滙豪庭加價約3.88%重售?15樓C室尋日賣咗，成交價約2,841.2萬元，呎價約24,100元。呢個盤累售12伙，套現約3.6億元，平均成交呎價約23,711元。佢又話，樓價至今已累跌10%，料再跌幅度唔大，跌幅5%之內。集團會按照時間表以貼市價推盤。