2014-03-20
太陽報
市況逆轉，早排熱賣嘅劏舖大幅劈價搶客，由資深投資者尹柏權持有、曾經銷情相當火熱嘅荃灣荃立方，啱啱搵代理以清貨姿態推售最後29個劏舖，買家不但全免印花稅，最高更有樓價30%回贈，並且提供兩年6厘嘅租金回報保證；而經折實後入場費低見約163.5萬元，呎價由1.82萬元起，料呢一批貨尾單位折實總成交金額可高逾7,000萬元。
美聯工商舖行政總裁黃漢成同劉Sir講，位於荃灣海壩街122至132A嘅荃立方，早前因為曾經涉及圖則修改，令有部分交易取消咗，依家剩番閣樓、1樓同2樓合共最後29個舖，建築面積由約62至144方呎。
兩年6厘回報保證
上述項目唔單止免買家全套印花稅，仲由之前提供兩年5厘租金回報，調升至6厘回報保證，而買家喺六十日內成交，將可獲回贈樓價25%，九十天內則回贈20%，另外無需發展商提供一按同二按服務，仲可以扣減樓價5%，變相最高劈價達三成。
睇番新價單，最平係1樓單號舖，建築/實用面積約64/32方呎，原價233.6萬元，折實售價163.52萬元；而呎價最低為2樓雙號舖，建築/實用面積約124/62方呎，折實售225.68萬元，建築/實用呎價約1.82萬/3.64萬元。
美聯盧展豪話，項目預計五月入伙同開始招租，現時已有60至70個有興趣承租人士查詢，料租金水平與同區地皇廣場相若，每方呎介乎80至100元。另有消息話，商舖投資者林子峰諗住日內拆售嘅元朗又新街「又一新城」，約一周內累積收到約200個洽購預留。
工廈活化 去年增12%
近幾年政府大力鼓吹工廈活化，劉Sir睇番地政總署資料，去年就總共有18宗簽立特別豁免書個案，比起二○一二年錄得16幢，多出約12.5%，當中改裝做商廈嘅佔一半。
以地區計，觀塘區工廈活化佔7幢，佔整體39%；葵涌佔6幢；其餘地區為上水、長沙灣、粉嶺及上水等。
劉Sir