2016-01-26
太陽報
二手買家專吼減價盤，現時業主要出貨，底線已經愈退愈低，唔少要去到二○一四年價位。好似上車盤荃灣中心有個高層戶，兩個月累減75萬元，以325萬元賣出，比去年中高位跌價逾24%，去番前年水平；而馬鞍山雅濤居亦有兩房戶狠劈120萬元，以460萬元先售出，個價就去番一四年中水平。至於東涌東堤灣畔有單位實用呎價跌穿8,000元，險守前年初價位。
美聯梁仲維同劉Sir話，荃灣中心今個月約莫有5宗買賣，要減價盤先有承接，好似15座高層G室，實用面374方呎，同類單位舊年八月成交價去到428萬元，今次個單位舊年十一月放盤叫價400萬元，先後減到去325萬元先賣出，低市價10%，實用呎價約8,690元，比高位跌價逾24%。
立坊實呎低見10249元
同區?立坊一向有上車客支持，該行陳曉昇話，屋苑有個低層7室開價480萬元，最終減到444.8萬元由上車買家承接，實用呎價10,249元，創屋苑新低。
至於馬鞍山區呢幾日都頻頻出現重返前年價位?成交。世紀21奇豐梁榮貴稱，雅濤居1座中層F室，實用面積482方呎，劈價120萬元後，以460萬元賣出，低市價10%，實用呎價9,544元，去返一四年中價位，比舊年高位跌價逾22%。
該行另稱，同區海濤居4座中層A室，同類單位半年跌價逾18%，賣咗628萬元，實用呎價約1萬元，屬前年五月價位。
利嘉閣話，東涌今個月有8宗二手買賣，其中東堤灣畔9座中層A室減咗38萬元之後，以660萬元賣出，實用呎價約7,604元。美聯話，奧運站凱帆軒2座中層D室僅售536萬元，實用呎價12,160萬元。據了解，兩宗成交個價都係去番前年初水平。
物業拍賣 銀主佔五成
近排個市繼續無咩起色，銀主盤數目就愈嚟愈多。環亞拍賣今日推出30個物業拍賣，佔15個為銀主盤，佔比例高達五成。該行曾傑俊話，一日有咁多銀主盤估計係近三年最多。
而指標屋苑都罕有出現半契銀主盤，該行下月初就會推出天水圍嘉湖山莊翠湖居低層G室銀主半契單位拍賣，實用面積548方呎，三房間隔，半契開價僅約70萬元。