2014-03-18
太陽報
下年度超甲級商廈租值勁瀉，據差餉物業估價署最新資料，中區唔少呢類商廈嘅應課差餉租值均報跌，超甲級商廈跌幅尤其嚴重，好似中環國際金融中心（IFC）同九龍站環球貿易廣場（ICC），部分租值大跌20%，個別更急跌超過37%，相信同上年度唔少財金機構「縮皮」，同搬去非核心區有關。
業內人士預期，呢類超甲級商廈最壞時間已經過去，至於未來商廈租金走勢將趨平穩，部分僅輕微下跌5%。
差餉物業估價署尋日公布新財政年度嘅應課差餉租值，劉Sir當然趁機查閱最新資料，發現中區甲級寫字樓普遍下跌5至8%，而個別超甲級商廈單位更出現大幅下瀉。
中環指標商廈IFC個別跌幅介乎15至25%，其中一期低層三層最新年租值為6,519.6萬元，按年跌幅達26.8%；而九龍站ICC唔少樓層嘅租值更急瀉逾30%。
資料顯示，九龍站ICC中高層逾十層全層，年租值為2.16億元，較上年度逾3.46億元，大幅下跌達37.6%。
IFC呎租跌至百餘元
事實上，舊年環球經濟未明朗，唔少金融機構「縮皮」，嚴控租賃成本，部分更搬至非核心區，拖累傳統超甲級商廈租值下滑。至於個別樓層嘅應課差餉租值跌幅較大，相信原因或於單一租戶承租多層樓面，令租值較低，新租值同舊租值差距自然較大。
戴德梁行寫字樓代理董事阮仲賢話，IFC高峰期時每呎租金高見200元，依家平均呎租約110至130元，個別達140至150元；而ICC呎租曾高達80元，現時高層呎租70多元，低層見60多元。
業界指最壞時間已過
但阮仲賢認為，商廈租賃最壞時期已經過去，由於現時供應緊絀，兩超甲廈空置率只係約1至3%，未來中環商廈租金睇微跌5%，九龍區料平穩。
另外，高緯環球香港執行總監蕭亮輝亦認為，中區商廈供應短缺，預期今年該區甲級商廈租金走勢橫行，而港島東由原預計跌5%，修正為持平。
劉Sir