2014-03-17
太陽報
上個星期大埔白石角大型臨海地皮流標收場，市場都未消化晒流標嘅負面影響，但係嚟緊本周五又到馬鞍山白石同埋坪洲教育路兩幅「一大一細」住宅地截標。劉Sir有個測量師老友就覺得呢幅馬鞍山白石大型地皮會幾受影響，所以調低地皮估值超過一成，估計每方呎樓面地價只係約4,000元，比年幾前同區地皮低逾兩成，估值約17.22億元，係市場下限價。
理想城市張聖典對劉Sir講，馬鞍山白石住宅地係低密度發展，相信高層單位可遠眺吐露港海景，質素唔錯。但基於大埔白石角地皮流標，搞到市場氣氛轉淡，所以調低馬鞍山白石地皮估值約11.1%至17.22億元。
高緯：規模大有風險
高緯環球張翹楚都話，大埔白石角啱啱有大型地皮流標，市場氣氛唔係咁好；而馬鞍山白石住宅地同樣有咁上下規模，相信會有相當風險。
不過，美聯測量師行林子彬就睇得比較好，佢話流標事件對新界地價梗會有壓力，之不過，馬鞍山新盤近排賣得幾好，加上未來供應又唔會好似大埔咁多。
林子彬仲話，參考番長實（00001）喺一二年底投到嘅同區落禾沙住宅地，每方呎樓面地價大約5,160元，而星期五截標嘅白石住宅地嘅質素會更好，所以樓面呎價維持約6,000元。
劉Sir知道，呢幅屬沙田市地段581號嘅馬鞍山白石住宅地，可建總樓面大約43萬方呎，並無限量要求，市場估值介乎約17.22至25.83億元，樓面呎價約4,000至6,000元不等。
坪洲地皮值逾二千萬
同日截標嘅坪洲教育路前坪洲公立志仁學校（北面部分）迷你住宅地，劉Sir相信區內擁地嘅信置（00083）會較進取競投。事實上，區內對上一幅批出嘅地皮都係由信置投得，當時坪洲東灣B地盤成交樓面呎價大約2,157元。
劉Sir同大家講吓將截標嘅坪洲教育路迷你地皮嘅資料，呢幅地可建樓面大約1.4萬方呎，市場估計樓面呎價最高約1,500元，估值超過2,100萬元。
劉Sir