2014-03-13
太陽報
甲級寫字樓單位轉售為租愈來愈多，除咗有業主加佣鼓勵代理搵租客外，有啲就罕有咁選擇開放單位畀人參觀。依家金鐘同觀塘加埋大約有10幾個呢類出招個案，好似舊年底曾放賣嘅金鐘力寶中心1座中層戶依家轉售為租，由於意向呎租貼近市價水平，再減空間唔多，業主決定開放單位以提高出租機會。
另同區海富中心1座有業主更送值15萬嘅單位基本裝修畀租客，相當於減租約5%。
美聯商業營業董事羅仲英同劉Sir講，雙倍印花稅辣招下，寫字樓買賣成交萎縮，唔少業主都暫時將單位放租，令租盤大增，部分業主就直接加佣畀代理。
信德佣金加到2%
聽講上環信德中心東翼有個低層單位，面積約1,600方呎，業主意向月租金約8萬元，呎租約50元，同時將促成佣金提升至約2%。
不過，亦有商廈業主主動搞單位開放日。力寶中心舊年第四季放租盤源只約20個，依家就增加至約30幾個，意向呎租約42至50元，貼近成交呎租約40至45元水平，業主再減租嘅空間實在唔多，其中，1座中層單位業主舊年底曾放賣，嗌價每方約2.2萬元。
由於市場反應麻麻，依家轉為招租，單位面積約2,425方呎，意向呎租約42元，月租金近10.2萬元，業主話單位有海景同園景，如果開放畀有興趣人士睇，出租率會高啲。
政府起動九龍東，觀塘甲級寫字樓數目愈來愈多，租盤亦趨升，有代理數過，區內新建寫字樓租盤已超過一百個，放租業主自然心急。
觀塘宏基十層求租
其中，今年初入伙嘅宏基資本大廈，依家放租盤約十層，為了突圍而出，該廈高層全層有個業主都搞開放日，意向月租金就維持約33.6萬元，以面積約1.2萬方呎計，呎租約28元。
除咗搞開放日單位任睇外，有業主針對租客貼身需要，送贈裝修等服務。
劉Sir收到風，金鐘海富中心1座一個中層單位，面積約2,800方呎，放租約半年，業主意向月租金企硬約12.3萬元，呎租約44元。
不過，若租客接受上述單位意向租金，業主可送贈基本裝修，包括重新間過室內單位同埋更換地毯等，費用加埋大約15萬元，以租期兩年計，每方呎即係減租約2元，變相調低意向租金約5%。
劉Sir