2014-03-12
太陽報
市區新盤開售潮一觸即發，各大發展商推盤宣傳攻勢逐漸「到肉」。長實（00001）積極部署月內開售屬馬年第一盤嘅長沙灣丰滙，樓書尋日終於面世，率先上載到樓盤網站，短期內料正式派發。該項目的示範單位有機會今個星期內開放，發展商仲事先張揚會先推第1座C、D同埋第2座B室打頭陣，全部都係三房單位，單位實用面積由601至745方呎。
多個市區新盤部署今個月內登場，長實高級營業經理何家欣尋日再召集各大傳媒同地產代理，進一步推介丰滙資料同賣點，仲首度披露項目唔同坐向單位嘅實際景觀同圖則等資料。
丰滙先攻三房單位
仲即日喺樓盤網站上載咗樓書，可以話係全面公開樓盤資訊，樓書短期內會正式上載到一手銷售資訊網及派發。
事實上，透過推介活動，劉Sir都大大提高咗對丰滙嘅了解。何家欣仲透露，該盤首張價單將提供唔不少於81伙，第一日開售希望可推售達100伙，首批將會主力推出唔同類型三房戶，預計包括第1座嘅C、D室同埋第2座嘅B室。
其中1座C、D室面積724至745方呎，呢類單位向東南方向，主要望旺角、何文田以至九龍塘一帶景致。
據項目圖則顯示，該盤第1、2座都係全部三房戶，第3座就清一色提供一房細單位，每戶面積362至391方呎。何家欣又話，丰滙示範單位工程已經啱啱完成，今個星期有機會開放。
太古MPR吸換樓客
另外，新地（00016）元朗爾巒本周四、五加推發售嘅103伙，尋日截止認購，錄逾1,200張入票。同系元朗RESIDENCE譽88剛獲批入伙紙，由於正安排現樓參觀等事宜，啱啱更新咗銷售安排。
恒地（00012）今截止認購的馬鞍山迎海第一期最新加推38伙，截至尋晚市場料錄逾180張入票。
至於太古地產（01972）嘅鰂魚涌MOUNT PARKER RESIDENCES（MPR）尋日開始收票，代理朋友話單日收到逾二十張入票，主要係同區換樓業主，亦有嚟自跑馬地區嘅收租投資者。
丰滙小檔案
物業座數：3座
單位數量：402伙
單位實用面積：第1座：711至745方呎、第2座：597至710方呎、第3座：362至391方呎
預計首日推售單位：達100伙
劉Sir