2014-03-11
太陽報
政府繼續加快推地步伐谷供應，早排截標嘅市區重建局深水埗順寧道項目，中標結果都未公布，尋日就已經推出土瓜灣新山道項目招標。劉Sir知道，呢個新山道項目先前收到23份意向書，不過，最後只有19家財團拎到「入場券」。據了解，項目將來賣樓收益超過13.3億元，即係平均呎價高約11,729元，中標財團先要按比例同市建局分紅，咁樣相信係變相賣斷項目。
宏安等四財團未入圍
市建局公布，該局董事會設立嘅一個招標遴選小組，考慮過有關發展商嘅經驗同財政能力後，決定邀請其中19家發展商入標，截標日期為四月七日。
獲邀入標財團就有長實（00001）、新地（00016）、新世界（00017）同萬科置業（香港）等。
至於今次不幸落選嘅四家財團包括宏安集團（01222），宏安地產營業及拓展董事黃耀雄同劉Sir講，市建局有其機制，今次項目規模都唔算細，未獲邀入標可能係經驗唔夠，嚟緊會加倍努力。至於未獲邀入標嘅遠東發展（00035）同莊士機構（00367）就無作出回應。
收益逾13.3億要分紅
劉Sir收到風，今次招標條款同以往差唔多，如果將來賣樓收益達13.3億元以上，中標財團就要向市建局按比例分紅。
達標後首個3,000萬元就分紅20%，之後第二同第三個3,000萬元係30%及40%；而去到9,000萬元以上比例為50%。
有測量師老友覺得，區內住宅依家成交實用呎價約1.2至1.3萬元左右，今次項目賣樓平均呎價超過約11,729元就要分紅，再計番實用呎價嘅話，佢就認為未必需要分紅。
呢個新山道商住重建項目，佔地約12,594方呎，總樓面約113,390方呎，並附設約18,902方呎商業樓面，以及提供約144個單位。
其中半數單位係平均實用面積約500方呎或以下嘅中小型戶。
劉Sir