2014-03-10
太陽報
市區舖租貴，唔少食肆都轉租二、三線街，刺激舖租上升。毗鄰西鐵柯士甸站嘅佐敦文英街，近年地舖租戶變化明顯，幾年前仲有唔少車房租戶，依家條街大部分商戶都係特色食肆。過去兩、三年間，條街嘅舖租累積升咗一倍。文英街有個交吉約四個月嘅地舖，業主意向月租嗌緊近4萬元，呎租差唔多要100元，租金升幅超過1.6倍，升幅可以媲美旺角西洋菜南街。
文英街係佐敦「八文樓」嘅街，而「八文樓」就由文景、文輝、文耀、文昌、文華、文英、文苑及文蔚樓組成，前身係油麻地碼頭倉庫同埋煤氣廠，屋苑喺六一年開始入伙。
街舖轉型 業主唔憂租
劉Sir早排去咗文英街食飯，數過條街有約40個舖，唔少商戶都係串燒、雞煲同日式餐廳等，比例佔成條街約四成，比起三年前得嗰一成，變化十分明顯。
睇番代理畀嘅資料，文英街地舖依家平均呎租約40元，比兩、三年前升咗約一倍。由於依家條街放租盤唔多，大約只有約兩個，加上條街陸續轉型做食街，業主唔憂租。
其中有個單號地舖，原先月租約1.5萬元，雖然已交吉約四個月，但業主意向月租金「企硬」近4萬元，以面積約400方呎計，呎租去到100元，反映到業主幾睇好條街前景。
五金舖難捱 搬隔籬街
喺文英街賣五金材料約十九年嘅陳先生話，「近幾年該街食肆多咗，業主都乘機加租，依家租緊嘅18號地下部分，月租只係2.8萬元，業主早前提出加租至4萬元，加幅逾42%，月前已預租附近嘅文蔚街一個面積相若地舖，月租只係3萬元。」
另外，剛於文英街開設茶餐廳創業嘅陳先生都話，「文英街特色食肆多，吸引到唔少外區食客慕名而來，加上租緊嘅8號地下部分，月租只係3萬元，比旺角同油麻地都平，所以選址文英街開舖。」
劉Sir