2015-06-30
太陽報
人行「雙降」未能利好股市，尋日更爆出中港股災，本地小業主膽顫心驚。有代理老友同劉Sir講，荔枝角美孚新邨5期蘭秀道5號一個低層放盤單位，上月中開價890萬元，但尋日早上業主見股市暴跌，就直接打畀代理行，話要減價40萬元或4.5%至850萬元，希望盡快套現，亦有代理就話，如果股市表現繼續向下，預計周末睇樓量同成交量都會減少。
港置谷學祖話，美孚新邨5期蘭秀道5號低層D室，實用面積約706方呎，原先開價890萬元。
但係業主有感最近股市上上落落，跌幅咁大，加上尋日股市開市早段就暴跌，所以早上就主動致電該行，話要減價40萬元至850萬元，減幅約4.5%，實用呎價約12,040元。
佢又話，其實業主係上個月已經買咗新樓用嚟自住，所以見股市咁波動，就急住套現。
谷氏又話，該屋苑7期荔灣道1號中層B室兩房單位，實用面積約609方呎，減價約2.3%，以733萬元售出，實用呎價約12,037元，仍略高市價，業主放盤僅兩日，就獲多組首次置業?買家還價，最終減價售出。
代理：股市跌影響微
利嘉閣傅德強就話，馬鞍山天宇海3A座高層B室，實用面積約953方呎，上月初叫價約1,200萬元，其後再減價約6%，以1,130萬元易手，實用呎價11,857元，略高市價1%。
但係美聯首席分析師劉嘉輝就同劉Sir講，本港樓市受外圍氣氛影響，而內地日前「降息降準」對經濟有支持，雖然股市最近出現短期震盪，但就暫時睇唔到對樓市?影響，不過若果股市持續向下，料會影響套樓換股潮。
新都城細三房682萬
而該行吳嘉權就話，其實，近月股市經常出現波動之後，沙田第一城已經出現5宗成交價較叫價低3至5%?成交，若股市持續向下，預計周末睇樓量同成交量都會減少。
另一方面，市場最近亦都有新高價成交個案出現。
利嘉閣劉浩勤同劉Sir講，將軍澳新都城3座中層E室，實用面積約538方呎，以約682萬元售出，創屋苑細三房單位創新高成交價，實用呎價約12,677元，較早前叫價下調約1.9%，買家為換樓客，本月該屋苑暫錄13宗成交，平均呎價約1.26萬元。
劉sir