2014-02-28
太陽報
二手樓市靜,唔劈番一百幾十萬根本無人吼,就連白居二單位都已經守唔住。好似馬鞍山錦泰苑最近有個兩房單位啱啱減到253萬元,由一名白居二買家接貨,比起上年九月同層同類單位,個價跌咗約8%,創屋苑近一年多低位。
世紀21奇豐梁榮貴講,馬鞍山近排白居二成交多咗,主要係個價跌得快。好似錦泰苑實用面積約700方呎兩房單位,上年年中高層最高成交過338萬元,最近有個同面積K座中低層6室,建築/實用面積約722/517方呎,開價都只係275萬元。
錦龍苑200萬失守
但近排個市呆滯,上述錦泰苑放盤最終要減到253萬元才賣出,建築/實用呎價約3,504/4,894元,買家係一個睇咗樓一、兩個星期嘅第二批白居二人士。同層隔籬個單位,上年九月都賣275萬元,今次口價已經去番一二年底個價位。
同區未補價居屋現時200萬元以下亦有選擇,該行趙詠欣話,同區錦龍苑C座高層10室,以綠表價192萬元賣出,以實用面積約401方呎計,實用呎價約4,788元。
公屋因樓價平繼續被搶,利嘉閣嘅報告睇到,一月份錄到約43宗公屋第二市場買賣,按月多兩倍。
月海灣削45萬易手
私樓樓價都跌,市場有消息,奧運站帝柏海灣5座中層兩房戶以643萬元賣出,係屋苑近一年多低位,建築/實用呎價約9,969/13,710元,有人話業主係內地人士,個價由690萬元減落嚟。
中原話,葵涌月海灣1座高層E室放盤半年,終於減45萬元,以385萬元賣咗,有銀行對單位估價達420萬元。至於東涌水藍.天岸1座中層C室賣526萬元,前後減價14%或84萬元。
元朗賣新盤,令同區二手樓價受壓。美聯話,該區YOHO MIDTOWN第3座低層單位減35萬元,以425萬元賣出。聽人講呢個價都幾低。
其實業主肯減,二手交投自然多番啲。劉Sir睇番十大屋苑今個月表現,直到昨日為止,都已經錄得約174宗買賣,比一月多咗12宗。
九龍指標荔枝角美孚新邨今個月就有32宗買賣,係十大屋苑中最多買賣嘅屋苑;而細價樓代表沙田第一城錄大約30宗,按月多成1.14倍。
世紀21奇豐講,沙田第一城1座頂層三房戶減價70萬元,以530萬元沽咗。
劉Sir