2014-02-27
太陽報
辣招推出已經一年，唔少投資者已經開始回流，亦多番啲內地投資者「南下」買工廈。不過，出手就明顯細注好多，個別單位購入價只百餘萬元，比起之前「縮水」超過七成。其中葵涌連環錄得兩宗呢類買家入市個案，包括梨木道金運工業大廈一個連約單位，以約164萬元賣出，呎價只近2,380元，低市價約3%。而九龍東同埋沙田石門都有佢哋入市嘅個案，每宗金額都唔過500萬元。
辣招推出前，內地投資者購入的葵涌區工廈做價，大多介乎600至700萬元，但係近期回流嘅同類投資者，入貨金額已跌至100多至200多萬元，縮水達七成。
金運減價連約賣164萬
劉Sir收到風，內地投資者開始番嚟香港買工廈收租。選址方面，由於葵涌區工廈好多單位面積細至500至600方呎，呎價二千幾元都有交易，比起九龍東工廈呎價低差唔多一半，所以區內連環錄得兩宗同類成交。
其中梨木道32至50號金運工業大廈，1座中層一個面積約690方呎單位，業主月前嗌緊約170萬元，早排降低意向價約6萬元後，即刻連約以約164萬元賣出，呎價近2,380元，租金回報約3.7厘。
同區打磚坪街68號和豐工業中心一個低層單位，面積約1,070方呎，業主舊年開價約235萬元連約放售，呎價唔使2,200元。代理話，今年初曾經有個準買家還價至約220萬元洽購。
不過，早排有個內地買家參觀後約一個星期，即以起初意向價買咗，單位依家每月租金約8,000元，租金回報約4厘。
環球工商回報3.5厘
辣招推出前，內地投資者喺九龍東都有掃工廈收租，唔少出手都好「豪」，每宗成交價約600至1,000萬元。
不過，近排佢哋就轉而細注入市，聽講九龍灣環球工商大廈有個中層單位，面積約1,000方呎，早排畀個內地長線投資者以約420萬元買入，呎價約4,200元，估計租金回報3.5厘。
喜利佳物業代理客戶經理黎紹賢認為，工商舖物業受辣招的影響相對住宅少；而本港工廈物業入場費低，租金回報率一般亦達3.5至4厘，故會吸引不少內地買家購入作為長線投資。
劉Sir