2016-03-31
太陽報
樓市彈極唔起，第一季新盤交投淡靜，部分新盤更索性暫緩推售步伐，發展商為求追數，第二季料將啟動更密集推盤攻勢。初步統計超過15個新盤會喺下季蜂擁登場，涉逾8,000伙，比起首季暫錄約1,500伙一手成交多出逾4.3倍。業界估計，隨着新盤競爭趨向激烈，發展商要以低價推盤先可以吸引買家入市。
受市況氣氛欠理想影響，第一季唔少發展商都同劉Sir呻賣樓賣得辛苦，部分仲索性暫緩推盤步伐「避戰」，令部分大型發展商喺第一季內完全未有開盤動作，部分新盤供應估計將會壓縮到下季先出現，勢將加劇下季新盤競爭。
新地5項目或參戰
睇番統計資料，第二季將有多逾15個新盤登場搶客，合共涉約8,095伙，當中相信以新地（00016）推盤態度最積極，成季有機會開售5個新盤，共涉約2,641伙，其中將軍澳海天晉會喺星期六「打頭陣」開售228伙，消息透露，呢批單位已經錄得逾2,300張入票，超額認購逾9倍。
至於何文田新盤戰團不斷壯大，嘉里發展執行董事朱葉培話，嘉里建設（00683）旗下區內皓畋最快今日開價，首張價單估計推出逾300伙，爭取下周開售，主要涉兩至三房戶，特色戶暫時唔推住，付款辦法會考慮用家同埋投資客需要。項目市值料約250億元。
對於近排個別新盤銷情一般，佢回應，唔同樓盤各有優劣，對皓畋銷售完全冇壓力，同區亦有豪宅新盤銷情理想。
佢又話，加息步伐放緩係正面訊息，估計四月樓市會回暖。皓畋尋日開放一組連裝修及交樓標準示範單位畀傳媒參觀，參照9座18樓A室搭建，實用面積960方呎，間隔三房連工作間。
ONE HOMANTIN套四億
長實地產（01113）早排突然取消發售12伙銷售安排?馬頭角君柏，料下季會啟動新一輪部署，九龍豪宅戰況勢續升溫。
會德豐地產市務助理總經理陳惠慈話，何文田ONE HOMANTIN賣咗33伙，套現逾4億元，售出單位包括1個天際特色戶，項目仲有2個天際特色戶同7個地下花園特色戶，已有唔少查詢，稍後有機會加推。
劉Sir