2014-02-26
太陽報
加辣招通過後，唔少業主寧願減價蝕讓亦要出貨套現。好似火炭御龍山連錄劈價幾百萬元嘅成交，兩個業主仲要蝕入肉。其中一個即使○九年入市，揸咗五年出貨，依家帳面都要蝕200萬元，連釐印及佣金等蝕逾300萬元，料為加辣招通過後最大宗蝕讓。
中原溫志樑同劉Sir講，加辣招草案獲立法會通過，部分業主都願意提高議價空間加快沽貨。好似御龍山9座高層A室，業主原本開價3,300萬元，喺辣招通過當日減價至3,000萬元賣出。
減辣無望 業主即削12%
該單位共減價300萬元或9%，以建築/實用面積2,379/1,845方呎計，建築/實用呎價1.26萬/1.63萬元。比一一年買入價3,186萬元，持貨約三年帳面蝕186萬元。
上述單位原來有兩名買家有意洽購，最終由一個同區換樓客成功買咗。至於另一個向隅買家，隨即轉買同屋苑另一個9座中層A室，個單位同樣有開揚東南馬場景，業主原本叫價3,150萬元，喺辣招通過當日減價400萬元或12.7%，最終喺星期日以2,750萬元成交，建築/實用呎價約1.16萬/1.49萬元。
至於上述單位嘅原業主，則喺○九年以2,950萬元購入該單位，持貨約五年，依家帳面都要蝕200萬元。
近排樓價跌勢轉急，該行蔡華航講，東涌藍天海岸1座中層一房戶，業主見單位收咗租咁多年，所以原本放盤價395萬元，已經畀市價低15萬元，其後有一個內地客傾價，最終再減10萬元，以385萬元賣出，係同類單位一年新低，實用呎價約1.01萬元，新買家畀雙辣招稅，要成75萬元。
世紀21北山都講，北角富澤花園富邦閣低層H室，賣咗745萬元，實用呎價約1.13萬元，都係一年新低。
帝峯累減280萬仍賺
由一許姓家族持有嘅西南九龍帝峯．皇殿2座高層單位，市傳由去年至今累積減價約280萬元，最終賣咗2,420萬元，四年帳面賺約900萬元。
另一方面，一個持有唔少豪宅嘅外資財團，最近以大約3,300萬元低價沽出一個九龍站君臨天下嘅1座單位。
劉Sir