【明報專訊】今屆立法會過咗大半年，Emily年初翻查議員利益申報時，見到由奧運金牌運動員「轉跑道」做議員嘅江旻憓（Vivian）申報有物業出租，不過Emily噚日發現，原來Vivian今年4月已經賣咗樓，帳面蝕咗超過100萬，暫時就未見佢申報再置業。
Vivian今年1月提交嘅利益申報，提及喺新界有一個出租住宅，今個月初佢更新利益申報時，就話冇擁有土地及物業。根據土地註冊處資料，Vivian喺2022年以463萬元買入沙田穗禾苑一個單位，至今年6月以346萬元賣畀一間叫「Kawaii Shop Limited」嘅公司，數數手指，帳面蝕咗117萬元。
公司註冊處資料顯示，Kawaii Shop Limited係從事零售貿易，唯一嘅董事兼股東叫吳直謙，同曾經打香港籃球男子甲一聯賽嘅球員同名。買賣雙方都係運動員背景，不過Vivian嘅團隊同Emily講，Vivian同對方並唔相識。
唔止Vivian賣樓，Emily翻查其他立法會議員最新嘅利益申報，留意到選委界陳曼琪最近都賣咗一個出租住宅，而新界西南郭芙蓉就賣咗兩幅新界農地同一個出租住宅。