【Emily】宏福特設銷售計劃今攪珠 不設採訪

【明報專訊】宏福苑住戶購買資助單位嘅「特設銷售計劃」今早11點半攪珠，有別於最近嘅資助出售房屋計劃例如「居屋2025」嘅攪珠安排，今次不設傳媒現場採訪。至於點解無現場採訪，房屋局無直接回應Emily，只係話「為確保攪珠環節的透明度」，業主可到「特設銷售計劃」網站睇直播，香港電台亦會喺港台電視32直播，並向本地電視台提供現場信號；又強調同其他居屋攪珠一樣，民政事務總署嘅聯絡主任今日會在場監察過程。 過往攪珠前夕，房委會都會經政府新聞處通知傳媒有關採訪安排，包括傳媒集合地點、邊個主持儀式等。Emily噚日見到由房屋局發出嘅「特設銷售計劃」攪珠通知，只交代會喺政府新聞處網站等渠道直播，無提及攪珠地點及主持人。 翻查資料，房委會喺2020年4月至2022年6月，因新冠疫情無安排公眾同傳媒睇攪珠，改為房委會facebook直播；其他情况一般都安排採訪。