2014-02-25
太陽報
政府講明會增加長遠住屋供應，改劃大型綠化用地做住宅陸續有嚟。劉Sir八到，其中九龍塘大窩坪延坪道北面一幅面積超過30萬方呎嘅山坡地，荃灣及西九龍規劃處就建議改住宅用途，提供逾88萬方呎樓面，而呢幅地都幾有睇頭，可以做豪宅。估計可以發展約1,100伙住宅單位，估值達70.43億元，睇怕有機會納入今個星期公布嘅新財政年度賣地計劃。
最近施政報告都提過，現時政府手上有約152幅地皮，可透過改劃土地用途作住宅發展，預計呢批改劃地可以喺未來五年提供大約21.5萬個單位供應。
鄰近九龍塘帝景峰
早排施政報告提到檢討本港地皮嘅用途同埋發展密度，為咗落實有關措施，荃灣及西九龍規劃處提出將上述大窩坪延坪道北面山坡地轉為住屋發展，而最近已經向深水埗區議會展開諮詢。
呢幅大窩坪山坡地位處《石硤尾分區計劃大綱核准圖》範圍，荃灣及西九龍規劃處檢討過大綱圖嘅土地用途同發展密度後，建議將呢幅鄰近九龍塘帝景峰嘅「綠化地帶」山坡地，改劃為「住宅（乙類）1」用途。
上述地皮面積約30.57萬方呎，擬議地積比率2.88倍，預計可以提供大約88.04萬方呎樓面，建築物高限為主水平基準以上210米。
該處亦都就修訂諮詢咗有關政府部門，仲確定咗唔會對區內交通、環境及通風等方面帶來重大影響，亦都唔會影響到現有社區設施同休憩用地嘅需求。
劉Sir知道，政府會喺呢個星期公布新財政年度嘅賣地計劃，如果呢幅大窩坪改劃地最後作為私宅發展，相信幾有機會納入新賣地表入面，以每伙平均面積約800方呎推算，可以提供約1,100個單位。
樓面地價每呎睇八千
高緯環球估計呢幅地每方呎樓面地價約8,000元，計番估值就大約70.43億元。至於地皮南面嘅帝景峰二手成交就比較少，最近一宗標準戶登記成交已經要追溯去到舊年十二月，當時6座中層B室以1,450萬元成交，實用呎價約15,183元。
劉Sir