2014-02-24
太陽報
英皇道向來係港島北角嘅主要消費街道，早前新地（00016）攞到同區渣華道前北角邨舊址商住同酒店地，估計未來會帶旺渣華道零售氣氛，依家條街地舖呎租只係40至80元，比起英皇道街舖租金低約五成。不過，有代理同劉Sir講，最快明年中，兩條街嘅舖租差距可以拉近至僅三成。
有代理同劉Sir講，鄰近新地購得兩幅地皮嗰段渣華道地舖，約有40個街舖，主要租戶仍然係民生類商戶為主，包括茶餐廳、診所同日常用品店等。
樓盤增 酒吧也進駐
該段街嘅新樓有THE JAVA同埋港濤軒等，所以人流都算旺，近期亦有不少酒吧同食肆進駐。
依家該段街舖呎租約40至80元不等，個別月租僅約3萬元；而同區英皇道一帶地舖租戶以連鎖店為主，呎租動輒過百元，月租以十萬元計，睇到兩條街嘅租戶承租能力有好大差別。
社區勢旺 即加租30%
香港置業至尊旺舖營業董事林偉文話，新地買咗渣華道前北角邨舊址兩幅地皮，其中住宅部分喺舊年十一月已獲城規會批准發展9幢物業，提供約702個住宅單位，相信項目可以打造成一個新社區，帶來高消費群。
同時項目亦設有14.5萬方呎購物商場，未來可以吸引更多外區顧客前來，帶旺渣華道零售氣氛。
至於另一幅酒店用地，可以提升呢段街道形象，由以往街坊嘅舊區，變身成為高檔零售區。佢相信，渣華道同英皇道等區內傳統消費街道租金差距，有機會最快明年中拉近至僅三成。
見證渣華道街舖過去幾十年變化嘅舊式理髮店高先生話，早喺三十一年前已租用該街一個地舖同閣樓開設上海理髮店，當時成條街有好多同類租戶，依家大部分都已搬走。月前個舖已經續咗租，新租金每月約6萬元，加幅約3成。
本身喺大坑經營酒吧嘅Patrick表示，因市區街舖租金飆升，一年前揀咗渣華道開分店，主要係貪條街租平，都預咗業主將來會大幅加租，到時先再打算。
劉Sir