2016-03-15
太陽報
樓市略見起色，發展商即刻鬥推新盤搶客，戰場更由上車細價樓擴展到豪宅高價市場。長實地產（01113）等馬頭角君柏昨日突擊公布首推10個特色戶招標，仲預告極有機會今個星期公布首批至少50伙標準戶開價。另何文田區3大新盤?部署亦步亦趨，其中ONE HOMANTIN料日內開價同開放示範單位。
長實地產投資董事黃思聰同劉Sir講，君柏昨日落實首推10個特色戶標售，當中包括5個頂層連天台同5個1樓連平台花園戶，單位的實用面積由1,574去到1,723方呎，天台面積介乎242至396方呎，平台面積一律692方呎，發展商唔提供指引價，招標期由今個星期五去到今年五月尾。
佢話，君柏極有機會喺今個星期推出首批標準單位?價單，至少有50伙，項目現樓單位由上周六開始開放，淨係過去周六、日已錄過千人參觀。
經絡按揭轉介夥金融機構為呢個盤買家提供過渡性貸款計劃，貸款額高達物業估值60%，買家享首年淨供息優惠，提早還款唔使罰息。
映御40伙先到先得
至於何文田區3個豪宅新盤有機會嚟緊短兵相接，聽消息講，會德豐地產?ONE HOMANTIN部署進度神速，繼日前突擊發布樓書後，最快日內開放示範單位同開價，有機會下周極速開售。同區嘉里建設（00683）皓畋就繼續披露面積等資料比代理加強市場滲透。
除咗豪宅戰況激烈，元朗區新盤戰況都漸趨白熱化，新地（00016）映御昨日再原價加推第6號價單，提供55伙，價單平均呎價11,726元，即供折實平均呎價約10,464元，發展商同時公布全新銷售安排，加推40伙喺星期五以先到先得形式發售，呢批單位價單平均呎價約11,588元，即供折實平均呎價10,341元，折實售價304.3084萬元起。
朗屏8號收千一票
嘉華國際（00173）總經理（香港地產）溫偉明話，同區朗屏8號最快今個星期較後時間開售首批單位，項目截至前晚累計收票超過1,100票。
恒地（00012）營業（一）部總經理林達民話，馬鞍山迎海·御峰賣咗25伙，平均呎價約14,042元，項目有加價空間，同系3、4期淨番啲單位都有機會加價。
劉Sir