【Emily】冬日巡禮20米聖誕樹亮燈

【明報專訊】旅發局「香港繽紛冬日巡禮」噚日喺中環開鑼，「聖誕天地」率先喺皇后像廣場登場，入面有5個影相位，包括20米高聖誕樹、各類巨型玩具、聖誕老人小屋等。旅發局話「聖誕天地」嘅聖誕樹有6層樓高，樹身燈光會變換呈現彩虹等圖案，外圍用「禮盒絲帶」設計配上燈效，樹底仲有小木偶運送聖誕禮物。聖誕樹兩邊有大型玩具飛機、吉普車，附近就有聖誕老人小屋，臨近12月下旬，聖誕老人仲會不時現身同市民互動。「聖誕天地」仲有巨型玩具飛船同小火車，小火車每20分鐘繞圈行駛，出發時會伴隨「嘟嘟」聲同煙霧，模仿舊時嘅蒸汽火車。火車行完一圈會停站15分鐘，方便大家影相留念。廣場涼亭就會變成「星光火車站」，畀大家坐低休息。