2015-05-19
太陽報
二手樓價繼續癲升，搞到有業主賣咗樓入唔番市，要賠訂封盤，相當慘情。劉Sir知道天水圍嘉湖山莊有三房戶業主沽貨後，出外睇樓，見樓價高企，只好打消換樓念頭，最後仲要賠訂同佣金加埋超過20萬元，將單位保留自住。而同屋苑都有個兩房戶業主，同樣喺沽貨後不久，賠訂及佣金約10萬元封盤。
中原黃海話，嘉湖山莊今個月錄約30宗買賣，景湖居有個8座高層A室三房單位，實用面積635方呎，上個月以475萬元賣咗，業主原先打算沽貨後買間港島樓，點知四出睇樓之後，有感樓價高企同考慮到按揭問題，最後寧願賠訂同佣金約24萬元，取消買賣，將單位再封盤自住。
曼克頓山實呎破萬六
該行馬斯力都話，同屋苑樂湖居14座有個低層兩房戶上月賣咗370萬元，之後業主都係覺得好難換到樓，最終都係賠訂同佣金，涉及約10萬元，再封盤自用。
樓價升勢未止，市場日日有創新高價。美聯吳志輝稱，荔枝角曼克頓山3座高層H室，實用面積581方呎，以968萬元賣出，創咗兩房戶新高，實用呎價約16,661元。同區美孚新邨再出現銀主盤，屋苑7期萬事達廣場3號有單位，現由銀主以750萬元放賣。
中原林錦榮稱，紅磡昇御門2座中層E室以605萬元賣出，實用呎價16,621元，創屋苑一房戶新高。名采策略李明浩稱，北角單幢樓兆年大廈低層D室售385萬元，實用呎價16,960元創同類新高。
藍籌屋苑買賣周升42%
今個月二手交投表現都唔錯，睇番美聯?資料，過去一星期（五月十一日至十七日）全港35個大型屋苑錄到97宗成交，比上一周多咗42.6%，宗數仲係二月底金管局推出新一輪收緊按揭成數措施後以嚟，首度逼近100宗水平，創16周新高。
利嘉閣劉浩勤話，將軍澳區本月錄144宗二手買賣，當中日出康城錄34宗最多。
另「on.cc東網」民調睇到，喺現市況下，考慮入市?受訪者比例按周跌咗約7.8個百分點，最新佔比例約32.4%；而暫時唔諗住入市?比例就回升，按周大幅升咗約10.6個百分點去到約60.6%，佔比例最多。
劉Sir