2015-03-17
太陽報
零售市道麻麻，核心區舖位租金唔升反跌。近年坐擁舖王地位嘅銅鑼灣景隆街嘅租值都係「有升冇跌」，不過劉Sir昨日睇到最新差估署資料，發現條街有三個舖位嘅一五及一六年度應課差餉租值齊跌。其中一個舖位更大跌192萬元，按年跌咗31%，而最旺嘅羅素街舖位租值升幅都係一成左右。代理就睇淡今年核心區租金走勢，話會下跌5至10%。
劉Sir發現核心區舖位嘅新一年度度應課差餉租值罕見地出現跌幅，其中景隆街竟有三個舖位都錄得跌幅，介乎5.2%至31%，跌幅最誇張係景隆街雙號地下C號舖，應課差餉租值只係420萬元，按年足足跌咗192萬元。
內地客減 租勢再挫10%
不過同區羅素街啲舖位情況又未見咁惡劣，好似羅素街8號同38號地下幾個舖位，租值都錄得少少升幅，約莫4.8至10.2%，但比上一個年度升幅有50至60%，已經明顯收窄。
至於旺角主要街道西洋菜南街部分舖位嘅應課差餉租值竟然逆市上升，上升幅度高達34.9%。利嘉閣鄭德明話，一線街舖租值錄得跌幅唔算太出奇，始終個人遊數目下跌，商戶生意就肯定受影響，估計租金會再跌5至10%。
寫字樓方面，去年大部分核心區商廈都表現不俗，如中環國際金融中心1期高中低層都有物業租值上升，最勁升咗20%，而同區皇后大道中九號單位更升10%；而九龍灣中國建設銀行中心單位租值更勁升25%。高力國際顏慧萍話，個別商廈租值勁升，主因是空置率低。
另外，私宅租金升幅驚人，市民可以負擔嘅租盤愈嚟愈少，令到月租較小嘅新界中小型單位租務增加，差餉物業估價署最新資料，截至上周五已估價嘅私人住宅物業共174.5萬伙，應課差餉租值約2,569.9億元，比起舊年多約1.4%及10.9%。
新界細宅量增12%突出
劉Sir以地區及面積劃分9類單位，以新界區實用面積752呎或以下嘅中小型戶按年升約12.8%至約78.9萬伙，大幅跑贏大市，數目同升幅都係各類單位最多。
中小型住宅租值急升，沙田第一城有高層A室年租值10.26萬元，按年升10%，天水圍嘉湖山莊平均升幅都有一成。中原楊文傑話，鰂魚涌康怡花園E座高層15室兩房月租2.2萬元，實用呎租41.4元創新高。