深圳灣口岸3的士車禍 2司機傷

【本報訊】昨晨11時許，一輛紅色的士在深圳灣口岸的士站攔腰撞向一輛綠色的士，再將其推向鄰線，殃及另一輛紅的。意外後，肇事的士車頭損毀，姓許（69歲）的哥報稱腰痛；另外兩輛的士俱右邊車身受損，駕駛綠的之姓蕭（72歲）的哥前額流血，捱撞紅的之姓凌（54歲）女司機無受傷。兩名傷者由救護車送往屯門醫院治理。據了解，肇事司機懷疑「踩錯掣」，導致紅的高速穿越草叢，引發今次車禍。 有車Cam拍下意外一刻，可見肇事紅色的士突然剷過草叢，撞向停泊在路邊的綠色的士右車身。由於撞擊力巨大，綠的被打橫推離行車線，最後撞到另一輛紅的。 網民對意外熱議，有人打趣道：「個客我見到先架（㗎）」、「比（畀）你哋見識下電車嘅短程加速嘅威力啦」、「嘩，唔同色啫，唔使直隊呀」、「綠的應該發夢都估唔到排緊隊都會俾（畀）車撞」，另有留言狠批：「果真係優質的士，咁簡單嘅路，只係向前移動少少，咁都可以出到意外，識揸車都知佢畀咗大油啦，輕微撞都算，仲要重撞，要有幾大嘅決心果腳先可以踩到落去呢」。