【明報專訊】開業35年、喺金鐘統一中心嘅名都酒樓上月底結業，科大早前以3.5億元買入呢個舖位做商學院嘅教學設施。科大商學院署理院長許佳龍噚日出席傳媒午宴，提到單位裝修緊，預計明年中啟用。佢又主動「澄清」話「唔係我哋趕走名都！」佢話名都當時已賣盤一段時間，適逢學院希望喺市中心置業，方便兼讀制學生上堂，雙方「一拍即合」。佢又話名都結業當日自己都有幫襯，仲影相留念，大家都好開心。話接洽時已放盤多時許佳龍主動話：「雖然在座各位（記者）都無呢個誤解，但我都係要講，唔係我哋趕走名都！」佢話名都當時賣盤，希望將單位賣畀一間「唔係用嚟賺錢」嘅機構，「有啲公司買番嚟，劏咗幾十間（單位）賣畀人賺錢，佢（名都）唔想咁」；其後科大同名都接觸，傾咗幾個月達成協議，許形容過程好順暢。單位面積超過3萬平方呎，許佳龍話除咗會有課室、會議室等做教學用途、出租搞活動，亦有地方畀校友聚腳。佢特別提到新設施將聚焦開辦非學位或兼讀制課程，方便學生放工後上堂進修。相關字詞﹕許佳龍科大商學院統一中心名都酒樓