【明報專訊】過去每屆立法會完結都會舉辦惜別宴，不過喺一個又一個議員接連宣布棄選嘅「低氣壓」下，繼取消「畢業飯」後，本來周五特首李家超都會出席嘅惜別午宴都搞唔成，亦係歷來首次無惜別聚會，未知會唔會後補。立法會秘書處噚晚約7點通知議員，解釋收到不同議員向大主席梁君彥反映，因為換屆參選提名期臨近，「許多議員現時都希望可聚焦處理選舉事宜」，喺通知特首辦並獲對方理解後，主席決定唔搞午宴。據原先安排，李家超喺午宴開始前會致辭，立法會早前斥資約20萬元製作、舊年通過23條時嘅微縮模型亦會揭幕。Emily噚日喺消息公布前路過宴會廳，職員已準備好大屏幕等設備，𠵱家暫用唔上喇。以前每屆立法會曲終人散後，官員同各黨派議員都會輕鬆共聚食飯唱歌，兼告別唔連任嘅議員，例如2016年惜別宴，建制泛民合唱《朋友》，即使2021年新冠疫情期間都有舉辦。相關字詞﹕棄選立法會惜別晚宴