【明報專訊】立法會換屆在即，噚日有傳媒報道，近日紛紛有議員公布放棄連任，議員間一片「低氣壓」，原定下星期舉行嘅議員「畢業飯」都告吹。負責飯局嘅金融界議員陳振英噚日同Emily確認「畢業飯」取消，解釋話係場地問題，加上較少議員出席喎。據悉飯局由下屆立法會主席人選大熱嘅陳振英牽頭，被問到飯局取消係咪同近日議員接連棄選嘅「低氣壓」有關，陳振英話唔清楚，只係話近日「比較沉靜，少咗講嘢」，希望今日立法會大會多啲人發言，「氣氛好番啲」。梁君彥滿意今屆行管會讚立會大樓擴建係亮點另外不同小組會陸續總結今屆工作，已經宣布唔競逐連任嘅主席梁君彥噚日喺facebook公布行管會嘅成績，包括立法會大樓擴建工程、翻新立法會地下大堂、喺會議廳安裝超高清攝影系統等，佢就好滿意今屆成績，形容行管會交咗「一份亮麗嘅工作成績表」。云云功績中，梁君彥話立法會大樓擴建工程可以安穩地提早6個月完成，係行管會成績表一大亮點，令今屆所有議員喺會期結束前進駐新辦公室，同秘書處職員可以「同一屋簷下」工作。佢又話深信下屆立法會行管會將繼續妥善履行法定職能，幫立法會同秘書處服務市民。