2025-10-06
ming
【明報專訊】香港殘奧日噚日移師啟德體藝館舉行，公眾可免費試玩約20種殘疾運動項目。文化體育及旅遊局長羅淑佩落場試玩乒乓球，佢致辭話，期待香港喺12月殘特奧會「會有更多金牌、銀牌、銅牌進帳」，又呼籲公眾入場支持香港運動員。活動提供硬地滾球、盲人門球、坐式排球、輪椅劍擊等殘疾項目畀公眾試玩，並設展講述殘奧會同香港殘疾運動發展。有家長帶埋小朋友入場，希望小朋友接觸書本以外知識，並學習運動員嘅堅毅精神。羅淑佩朝早為開幕禮致辭，話今年粵港澳攜手合辦殘運會同特奧會，香港作為東道主之一亦具備承接比賽項目嘅條件，畀全國各省市運動員聚首一堂，切磋技藝、建立友誼。佢又話噚日距離殘特奧會開幕剩番64日，「既興奮，又緊張」，相信比賽完結後，大家建立嘅友誼同傷健共融嘅精神會傳承落去。羅淑佩又話，政府透過香港體育學院同各體育總會，全面支援香港運動員，包括殘疾運動員，備戰同參與各類大型國際綜合運動會，而最近一連串嘅好成績都係大家同心合力嘅成果。